(Видео) Филипче: Да се укине акцизата за горивата и ДДВ да се намали на 5%

Претседателот на СДСМ, Венко Филипче, на денешната прес-конференција предлага укинување на акцизата за горивата и намалување на ДДВ-то од 18 на 5 проценти, мерки за кои вели дека би донеле поголемо намалување на трошоците за граѓаните.

Филипче оцени дека мерките што ги најавува Владата се задоцнети и недоволни и порача дека треба да се преземат посуштински чекори за намалување на цените на горивата.

— реклама —

„Да се укине акцизата на горивата и ДДВ-то да се намали од 18 на 5 проценти“, рече Филипче на денешната прес-конференција.

Тој направи споредба меѓу ефектите од мерките што ги предлага Владата и предлогот на СДСМ. Според неговите пресметки, доколку ДДВ-то се намали од 18 на 10 проценти, лице со просечна нето плата би можело да купи 513 литри евродизел или 535 литри евросупер.

— реклама —

Со мерките што ги предлага СДСМ, според Филипче, би можело да се купат 621 литар евродизел, односно 108 литри повеќе, или 740 литри евросупер, што е 205 литри повеќе.

— реклама —

Тој посочи дека разликата би била уште позначајна кај лицата со минимална плата. Според неговите пресметки, наместо 276 литри евродизел, би можеле да купат 334 литри, односно 58 литри повеќе. Кај евросуперот, разликата би била од 288 на 398 литри, односно 110 литри повеќе.

Филипче оцени дека пониските цени на горивата би имале поширок ефект врз економијата и би можеле да придонесат за намалување на дел од останатите цени, особено на основните производи.

— реклама —

„Сметаме дека ова се вистински мерки, кои граѓаните ги заслужуваат“, порача Филипче, при што ја критикуваше Владата за, како што тврди, високите цени на прехранбените производи и за начинот на трошење на јавните средства.