(Видео) Филипче: Кој ќе ја плати струјата за дата-центрите – ќе има ли ново поскапување и дополнителен увоз?

Потрошувачката на електрична енергија од планираните дата-центри отвора сериозни прашања за цената на струјата, потребата од дополнителен увоз и расположливите капацитети за идни инвестиции, предупреди претседателот на СДСМ, Венко Филипче на денешната прес-конференција.

— реклама —

Тој побара од власта да одговори како ќе се обезбеди потребната електрична енергија за дата-центрите и дали нивната голема потрошувачка би можела да доведе до зголемување на цената на струјата или до поголема зависност од увоз.

„Овие дата-центри трошат огромен капацитет на струја. Дали тоа значи дека поради тоа што струјата ќе се троши повеќе, ќе поскапи? И дополнително на тоа, ќе зависиме од дополнителен увоз“, рече Филипче.

— реклама —

Според него, дополнително се наметнува прашањето дали големата потрошувачка на дата-центрите ќе го ограничи капацитетот за отворање нови фабрики и други производствени капацитети во нивната близина.

— реклама —

„Што ќе се случи со цената на струјата? Дали тоа големо искористување ќе ја поскапи? Дали тоа значи дека има дополнителен увоз? Дали тоа значи дека нема да има капацитет за ништо друго да се направи во околина на дата-центрите поради тоа што тие користат многу струја? На пример, ќе може ли во околина на некој дата-центар да се изгради фабрика? И дали воопшто ќе има струја за тие фабрики?“, праша Филипче.

Тој оцени дека пред реализацијата на ваквите проекти мора јасно да се утврди нивното влијание врз електроенергетскиот систем, цената на електричната енергија и можностите за идни индустриски инвестиции.