(Видео) Филипче: Мицкоски излажа, прославата за независноста чини 5 милиони евра народни пари

Претседателот на СДСМ, Венко Филипче, на денешната прес-конференција го обвини премиерот Христијан Мицкоски дека ја довел јавноста во заблуда кога тврдеше дека за прославата на 35-годишнината од независноста не бил потрошен ниту еден денар од Буџетот.

Филипче на денешната прес-конференција рече дека, според документи што, како што тврди, произлегле од 167. седница на Владата, АД Државна лотарија треба да ја организира прославата со средства во вредност од пет милиони евра.

— реклама —

„Мицкоски изјави дека за оваа прослава не бил потрошен ниту еден денар народни пари. Но, од 167. седница на Владата излезе на виделина дека АД Државна лотарија, која е стопроцентно во сопственост на државата, треба да ја организира прославата со пет милиони евра народни пари, пари на граѓаните“, рече Филипче.

Тој оцени дека средствата со кои располага Државната лотарија не може да се третираат како приватни средства или донации, туку како пари на граѓаните. Филипче побара од Владата да објасни зошто било кажано дека прославата не чини ништо за граѓаните.

— реклама —

Дополнителен сомнеж, според лидерот на СДСМ, отвора и начинот на кој била избрана компанијата што го организирала настанот. Тој побара да се објават критериумите според кои била избрана компанијата, како и податоците за нејзините претходни ангажмани со Државната лотарија.

— реклама —

Филипче оцени дека средствата можеле да бидат искористени за други потреби, меѓу кои земјоделски субвенции, здравство, образование, социјална помош, пензии и минимална плата.

Тој побара Владата веднаш да го објави записникот од 167. седница, целокупната документација поврзана со постапката, како и поединечните исплати на сите учесници во организацијата на прославата.

— реклама —

„Се знае само вкупната сума од пет милиони евра, но не се знае кој и колку пари зел. Бараме тоа да се каже јавно и гласно“, порача Филипче.