(Видео) Филипче: Мицкоски живее во свој свет - граѓаните живеат со празни паричници и празни фрижидери

Претседателот на СДСМ, Венко Филипче, на денешната прес-конференција остро ги критикуваше економските политики на Владата, оценувајќи дека статистичките показатели што ги презентира премиерот Христијан Мицкоски не ја отсликуваат реалната состојба во која живеат граѓаните.

Филипче, на денешната прес-конференција, рече дека Владата ја започнала третата година од мандатот без резултати во клучни области како економијата, здравството, образованието и земјоделството.

— реклама —

„Не гледаме резултати на полето на економијата, во здравството, во образованието, во земјоделството. Имаме најлош извештај од Европската Унија, нема владеење на правото, нема реформи во правосудството, нема слобода на медиумите“, рече Филипче.

— реклама —

Тој се осврна и на економските податоци што ги презентирал Мицкоски, оценувајќи дека тие не соодветствуваат со секојдневието на граѓаните.

„Вчера го слушам на интервјуто, платите растеле 70 пати или проценти, што и да сакаше да каже, побрзо, пензиите, замислете, 325 проценти, се споредува со времето на владите на Социјалдемократскиот сојуз на Македонија. Меѓутоа, граѓаните не можат да се излажат“, рече лидерот на СДСМ.

— реклама —

Според Филипче, граѓаните не ги чувствуваат бројките што ги презентира премиерот, туку се соочуваат со поинаква економска реалност.

„Тие бројки кои што премиерот ги кажува, очигледно од светот во кој што само тој и неговата мала група на луѓе околу него живеат, граѓаните не ги чувствуваат. Тие ги гледаат празните паричници и празните фрижидери“, порача Филипче.