Претседателот на СДСМ, Венко Филипче, денеска на прес-конференција реагираше на одлуката на Обвинителството да го затвори предметот за набавката на модуларните болници, оценувајќи дека со тоа, како што рече, се потврдува дека немало злоупотреба на службената должност ниту штета по државниот буџет.
Филипче изрази жалење за загинатите во пожарот во модуларната болница во Тетово и упати сочувство до нивните семејства.
„Јасно кажа обвинителството, нема злоупотреба на службената должност, нема штета на буџетот и тоа го отсликува целокупното мое работење“, рече Филипче.
Тој обвини дека во изминатите пет години бил цел на, како што ги нарече, „лажни обвинувања“ од страна на Христијан Мицкоски и ВМРО-ДПМНЕ, при што бил нарекуван „убиец“ и бил споредуван со германскиот лекар Јозеф Менгеле.
„Пет години зборуваат за мене дека сум убиец, ме споредуваат со убиец, ме споредуваат со доктор Менгеле. Замислете, јас што спасувам животи, за кој здравјето на граѓаните ми е на прво место“, изјави Филипче.
Тој потсети дека по пожарот во Тетово поднел оставка, како што рече, од морални и човечки причини.
Филипче го критикуваше и односот на премиерот Мицкоски кон трагедијата, обвинувајќи го дека повторно ги користи чувствата на семејствата на загинатите во своите политички настапи.
„Јас сега тоа нема да го правам споредба. Нема поради тоа што сум човек, имам емпатија и сочувствувам“, рече тој.
Претседателот на СДСМ побара од ВМРО-ДПМНЕ и од Мицкоски да им се извинат на семејствата на загинатите, но и на граѓаните, за она што го опиша како петгодишно ширење „лажни вести“ и несоодветен политички наратив.
На крајот од прес-конференцијата, Филипче порача дека по следните избори, како што рече, „доаѓа правдата во Македонија“, додавајќи дека Мицкоски и ВМРО-ДПМНЕ ќе одговараат за, како што оцени, нивното работење во изминатите две години.
