(Видео) Филипче: Повикувам на мобилизација, да со спречиме Мицкоски да ја жртвува водата и струјата за профити од дата-центри

Претседателот на СДСМ, Венко Филипче, преку видео обраќање повика на, како што ја нарече, „национална мобилизација“ против изградбата на дата-центри, обвинувајќи ја Владата дека водата и електричната енергија на граѓаните сака да ги стави во функција на приватни бизнис-интереси.

Филипче на прес-конференција рече дека СДСМ веќе еден месец предупредува за, според него, опасностите од ваквите проекти, а како пример го посочи Пехчево, каде што, како што тврди, се обиделе да протнат изградба на дата-центар.

— реклама —

Тој оцени дека постапката се водела без доволно информации и транспарентност и додаде дека по притисок од СДСМ, советниците на партијата и јавноста, точката била повлечена од дневен ред. Според него, тоа не значи дека Владата се откажала од идејата.

„Повикувам на национална мобилизација да спречиме водата и струјата да паднат во раце на профитери на грбот на народот“, порача Филипче.

— реклама —

Тој ја обвини Владата предводена од Христијан Мицкоски дека сака водата и електричната енергија да ги стави во функција на странски дата-центри и оцени дека евентуалните трошоци би ги понеле граѓаните преку повисоки сметки.

Филипче отвори и прашања околу потрошувачката на вода и електрична енергија, како и начинот на кој би се третирала загреаната вода од ваквите објекти.

„Кој ќе ја плати таа струја? Граѓаните преку повисоки сметки. Кој ќе нема вода? Граѓаните. Каде ќе оди затоплената вода? Никој не кажува“, рече тој.

— реклама —

Лидерот на СДСМ ги повика советниците во општинските совети ширум државата да се спротивстават на проекти за кои смета дека би можеле да ги загрозат ресурсите на граѓаните, како и самите граѓани да се вклучат во, како што го нарече, граѓански отпор.

Филипче порача дека СДСМ ќе продолжи да се спротивставува на изградбата на дата-центри и повика на заедничко дејствување против, како што тврди, ставањето на водата и електричната енергија под ризик поради бизнис-интереси.