(Видео) Филипче: СДСМ поднесе закон, Минималната плата да се зголеми на 600 евра – работниците заслужуваат достоинствен живот

СДСМ повторно отвора прашање за зголемување на минималната плата, овојпат со предлог таа да достигне 600 евра, односно 36.960 денари. Пратеничката група на партијата и коалицијата денеска во Собранието го поднела предлог-законот, а претседателот на СДСМ Венко Филипче оцени дека со ова би им се овозможило на работниците полесно да ги покриваат основните трошоци и да имаат достоинствен живот.

Филипче смета дека сегашната минимална плата од 26.000 денари не е доволна во услови на зголемени трошоци за живот, особено поради поскапувањето на храната и горивата. Според него, голем број работници имаат примања меѓу минималната и просечната плата и тешко ги покриваат секојдневните потреби.

— реклама —

„Во овој момент минималната плата изнесува 26.000 денари. Сметаме дека во оваа ситуација, на криза, на огромна цена на горивата, практично над 100 денари за литар гориво, за 50 проценти зголемена цената на горивата од почетокот на оваа година, што повлече спирала на поскапување на сите продукти, најмногу на прехранбените продукти, оваа минимална плата е апсолутно недоволна за добар, квалитетен и достоинствен живот“, рече Филипче.

Тој посочи дека минималната синдикална кошница изнесува близу 70.000 денари, а доколку се додадат трошоците за кирија или отплата на станбен кредит, вкупната сума достигнува и над 90.000 денари.

— реклама —

Според Филипче, со сегашната минимална плата се покриваат околу 37 отсто од трошоците без кирија или кредит за стан, односно околу 31 отсто кога семејството има таков дополнителен трошок. Тој оцени дека ниту три минимални плати не се доволни за едно семејство да ги покрие сите трошоци за живот.

Ова е третпат СДСМ да предлага минималната плата да изнесува 600 евра, а Филипче обвини дека власта претходно двапати го одбила предлогот.

— реклама —

Тој ја критикуваше Владата и поради, како што рече, недостигот од помош за граѓаните кои живеат со ниски приходи, семејствата со повеќе деца и оние кои се зависни од социјална помош.

Филипче смета дека средствата за повисока минимална плата може да се обезбедат со намалување на непродуктивните и луксузните трошоци во Буџетот. Како пример ги посочи средствата предвидени за мебел, автомобили, патни трошоци и други расходи поврзани со функционерите.

— реклама —

Како дополнителна мерка, СДСМ предлага државата да ги субвенционира придонесите за приватните компании што ќе ги зголемат минималните плати. Според Филипче, на тој начин зголемувањето на минималната плата нема да претставува дополнителен товар за работодавачите, бидејќи разликата во придонесите би ја презела државата преку пакет мерки.