(Видео) Филипче: Тажен почеток на училишната година, 3.000 помалку деца, 433 паралелки помалку, затворени 26 училишта

Новата учебна година започнува со загрижувачки податоци, оцени претседателот на СДСМ, Венко Филипче, посочувајќи дека годинава има 3.000 првачиња помалку, 433 паралелки помалку и 26 училишта кои привремено се затвораат.

Филипче рече дека лани во прво одделение биле запишани околу 17.900 деца, додека годинава бројката е околу 14.900. Според него, намалувањето не се должи само на демографските движења, туку и на иселувањето на семејствата кои не ја гледаат својата иднина во земјава.

— реклама —

„3.000 деца помалку значат 3.000 семејства. Луѓето не ја гледаат иднината во земјава, затоа што нема мерки, нема напредок и нема доволно поддршка за граѓаните, особено за младите брачни парови“, изјави Филипче.

Тој оцени дека на состојбата влијаат и падот на животниот стандард, зголемените трошоци и, како што рече, недостигот од мерки за поддршка на граѓаните.

— реклама —

Филипче најави дека СДСМ повторно ќе го предложи во Собранието законот за зголемување на минималната плата на 600 евра, со субвенционирање на придонесите за приватниот сектор за разликата што би произлегла од зголемувањето.

— реклама —

„Работниците треба да можат да обезбедат достоинствен живот за своите семејства“, порача лидерот на СДСМ.

Според него, празните училници се еден од највидливите показатели за последиците од актуелните политики.

— реклама —

„Ова што се случува денеска – 3.000 деца помалку во училиштата – е еден од најсилните показатели за лошите политики на оваа власт“, рече Филипче.