Претседателот на СДСМ, Венко Филипче, на денешната прес-конференција ја обвини Владата дека без доволно информации за јавноста договара изградба на дата-центри кои би имале голема потрошувачка на електрична енергија и вода, предупредувајќи на можни последици врз водните и енергетските ресурси, како и врз земјоделството.
Како аргумент, Филипче објави документ од компанија, објавен пред три месеци, во кој, според него, се наведува дека за дата-центар што треба да се развива во земјава е обезбеден електроенергетски капацитет од 100 мегавати и дека постои директен пристап до реката Вардар.
„Ќе споделам со јавноста еден документ од една компанија, објавен пред три месеци, во којшто компанијата јасно и гласно наведува дека станува збор за дата-центар којшто треба да го развиваат кај нас, дека е обезбеден капацитет на струја од 100 мегавати, дека имаат директен пристап до реката Вардар“, рече Филипче.
Тој побара објаснување од Владата за тоа какви договори и обврски се преземаат и какви би биле последиците од работењето на ваквите центри врз расположливите количества вода.
Филипче изрази загриженост дека зголемената потрошувачка на вода за потребите на дата-центрите би можела да има последици врз земјоделството и снабдувањето на земјоделците.
„Дали тоа значи дека огромната количина на вода којашто ќе ја користат дата-центрите ќе ги остави нашите полиња и земјоделците без водоснабдување?“, праша лидерот на СДСМ.
Тој предупреди и на можните последици врз електроенергетскиот систем, со оглед на големата потрошувачка на овие центри. Според него, треба да се одговори дали зголемената побарувачка ќе влијае врз цената на електричната енергија и дали државата ќе биде принудена дополнително да увезува струја.
Филипче отвори и прашање дали ангажирањето големи електроенергетски капацитети за дата-центрите би можело да го ограничи просторот за изградба на нови фабрики и други производствени капацитети.
„Ќе може ли во околина на некој дата-центар да се изгради фабрика? И дали воопшто ќе има струја за тие фабрики?“, праша тој.
Филипче порача дека јавноста треба да биде информирана за планираните проекти, нивните услови и влијанието врз водните и енергетските ресурси, обвинувајќи ја Владата дека постапува нетранспарентно.
