„Вечерва се случи магија“, порача Македонската филхармонија по спектакуларната изведба на „Кармина Бурана“ под отворено небо во Градскиот парк во Скопје.
Музичкиот настан привлече бројна публика, која уживаше во едно од највпечатливите класични музички доживувања во последните години.
„Ви благодариме на сите што дојдовте во Градскиот парк“, објавија од Филхармонијата, изразувајќи благодарност до присутните кои беа дел од концертот.
Во изведбата на монументалното дело на Карл Орф учествуваа Македонската филхармонија, Софиската филхармонија и Државниот симфониски оркестар од Солун, под диригентската палка на Најден Тодоров.
Концертот „Кармина Бурана“ под отворено небо беше дочекан со воодушевување од публиката, а социјалните мрежи беа преплавени со фотографии, видеа и позитивни реакции за музичкиот спектакл што се одржа под ѕвезденото небо над Скопје.
