Новак Ѓоковиќ доби необичен подарок за време на подготовките за настапот на Ју-ес опен, а гестот веднаш му измами насмевка на српскиот тенисер.
При пристигнувањето на тренингот, домаќините му подарија минијатурна виолина. Подарокот има посебно значење за Ѓоковиќ, кој во последно време по победите на теренот често го прославува успехот со гест на свирење виолина.
Тој потег го посветува на својата ќерка Тара, која свири виолина. Ѓоковиќ веднаш ја закачи минијатурната виолина на својата торба за рекети, па останува да се види дали ќе стане негов нов талисман на турнирот.
Ју-ес опен започнува во ноќта меѓу недела и понеделник. Ѓоковиќ е трет носител на турнирот, зад Александер Зверев и Карлос Алкараз. Наградниот фонд изнесува 108 милиони долари.
