Српскиот тенисер Новак Ѓоковиќ повторно зборуваше за положбата на играчите и распределбата на парите на најголемите турнири.
На прес-конференција во Рим, Ѓоковиќ се осврна на долгогодишната борба за правата на тенисерите, но и на причините поради кои било основано Здружението на професионални тенисери.
Иако вниманието во јавноста последните денови е насочено кон можниот бојкот на Отвореното првенство на Франција поради финансиските услови, особено по изјавите на Арина Сабаленка, Ѓоковиќ истакна дека проблемот постои многу подолго и не се појавил преку ноќ.
„Главната цел во овој дел од сезоната е Ролан Гарос и сакам таму да бидам на највисоко ниво. Секако, важно ми е и да одиграм добро во Рим, но во моментов немам големи очекувања“, изјавил Ѓоковиќ.
Потоа детално објаснил зошто смета дека играчите со години немаат соодветен третман.
„За ова зборувам многу долго. Ова не е тема што се појави сега. Со години зборувам за проблемите на играчите и нивната позиција во тенисот. Некогаш тоа привлекува поголемо внимание, некогаш помало, но проблемите постојано постојат“, порача српскиот тенисер.
Ѓоковиќ нагласил дека токму поради тоа учествувал во формирањето на Здружението на професионални тенисери, организација што се обидува да ги застапува интересите на играчите надвор од постојниот систем.
„Сметав дека е потребно да се пронајде посериозно и долгорочно решение. Системот е поставен така што во голема мера не им оди во прилог на тенисерите и затоа сакавме да се обидеме да промениме одредени работи преку здружението на играчи“, објаснил Ѓоковиќ.
Посебно му пречи начинот на кој во јавноста често се толкуваат неговите изјави за парите во тенисот.
„Во минатото забележав дека луѓето често ги извртуваа моите зборови и велеа дека барам повеќе пари за себе, дури и кога освојував гренд-слемови. Сакате да ставате наслови дека победникот на гренд-слем добива толку и толку пари, најмногу во историјата. Секогаш се истакнуваат огромните суми што ги добиваат шампионите, но ретко се зборува за тенисерите кои едвај преживуваат на турнејата“, рекол Ѓоковиќ.
Според него, најголемите проблеми ги имаат играчите што не се во самиот врв на листите на ATP и WTA.
„Многу тенисери се откажуваат бидејќи немаат доволно средства да ја продолжат кариерата. Малкумина навистина можат да живеат од овој спорт кога ќе се покријат сите трошоци – патувања, тренери, подготовки. Кога сè ќе се собере, многу мал број играчи остануваат во плус и можат да ја планираат иднината“, истакнал тој.
Говорејќи за структурата на професионалниот тенис, Ѓоковиќ оценил дека играчите во постојниот систем практично немаат вистинско влијание.
„Бев дел од Советот на играчи и знам како функционираат работите одвнатре. Од страна можеби изгледа дека играчите имаат одредена моќ, но во пракса тоа не е така. Целиот систем е организиран на начин што не им овозможува да го остварат она што го бараат. Затоа најдобрите играчи се обидуваат директно да преговараат со гренд-слем-турнирите и мислам дека тоа е единствениот пат кон промени што би им користеле на сите“, заклучил Ѓоковиќ.
