Градоначалникот на Град Скопје, Орце Ѓорѓиевски, информира дека со засилена динамика продолжуваат градежните работи на довршувањето на булеварот „Борис Трајковски“, еден од најголемите инфраструктурни проекти во главниот град.
Според него, работите се одвиваат според предвидената динамика, а по нивното завршување повеќе од 100.000 жители ќе добијат модерен булевар со четири сообраќајни ленти, пешачки патеки и велосипедски патеки, што значително ќе ја подобри безбедноста и проточноста на сообраќајот.
Во рамките на проектот, трасата е речиси целосно пробиена, а паралелно се гради и нова атмосферска канализација, со што трајно треба да се решат долгогодишните проблеми со одводнувањето во овој дел од Скопје.
Ѓорѓиевски истакна дека реализацијата на проектот ќе придонесе за намалување на сообраќајниот метеж, подобрување на условите за движење и создавање современа и функционална сообраќајна инфраструктура.
„По повеќе од три децении чекање, булеварот „Борис Трајковски“ конечно добива решение и се исполнува едно од најважните инфраструктурни очекувања на жителите од овој дел на Скопје“, порача Ѓорѓиевски.
