(Видео) Голема експлозија во воен објект во Бугарија: Евакуирани околу 300 работници

Експлозија и пожар избувнале денеска во воено-производствен и складиштен објект во близина на селото Белица, во општина Трјавна, Бугарија, по што биле евакуирани околу 300 работници.

Инцидентот се случил околу пладне, кога, според првичните информации, се запалил камион, по што огнот се проширил кон едно од складиштата со муниција. Од објектот се слушале дополнителни детонации, а над подрачјето се издигнал густ чад.

— реклама —

Регионалната гувернерка на Габрово, Кристина Сидорова, соопшти дека нема загинати или повредени меѓу работниците и дека сите лица во објектот биле евакуирани.

Локалните власти ги повикале жителите на околните села да останат во своите домови поради чадот, а од безбедносни причини била наредена и евакуација на блиските населени места додека траела интервенцијата на пожарникарите.

— реклама —

Според првичните наоди, инцидентот најверојатно бил несреќен случај, а не саботажа. Бугарското национално радио јавува дека пожарот можеби избувнал додека цистерна со гориво ги полнела резервоарите, по што дошло до палење и експлозија на муницијата во еден од магацините.

Министерот за внатрешни работи Иван Демерџиев изјави дека властите продолжуваат со превентивната евакуација на околните населени места, со цел да се заштитат жителите и припадниците на интервентните служби.

— реклама —

Објектот го управува приватната бугарска одбранбена компанија ЕМКО, во сопственост на бизнисменот Емилијан Гебрев. Според официјалните документи, локацијата кај Белица е индустриски објект со висок потенцијал за ризик поради производство и монтажа на муниција, работа со експлозиви и поправка на оружје.

Компанијата има активности поврзани со производство, поправка и модернизација на оружје и муниција, а нејзиното работење во минатото било предмет и на меѓународни истраги.

— реклама —

Истрагата за причините за денешната експлозија и пожар во објектот продолжува.