(Видео) Хронологија на апсењето на двете лица кои бегале од полицијата со пиштолот на полицаецот: Што се случувало пред снимките со тепањето?

Сомневање за транспорт на дрога, обид за бегство, наводно одземање службен пиштол, сообраќајна несреќа и физичко насилство при приведувањето. Ова е хронологијата на случајот со двајцата млади луѓе, на возраст од 21 и 23 години, кој предизвика жестоки реакции во јавноста, а за кој „Скопје1“ дознава нови, досега необјавени детали.

Според неофицијалните информации на „Скопје1“, се започнало кога полициските службеници располагале со оперативни сознанија дека двете лица превезуваат наркотични средства по определена траса. За нив, едното од нив е добро познато и веќе е заведено во системот на МВР. Врз основа на тие информации била организирана полициска акција, во која биле вклучени повеќе службеници.

Полицајците го следеле возилото пред влезот во Кондово, во близина на железничката пруга и се обиделе да ги запрат лицата. Според истата верзија на настаните, наместо да постапат по полициската наредба, лицата исфрлиле кеса од автомобилот и се обиделе да побегнат. Го стартувале возилото и возеле наназад, по што и удриле во столб.

Еден од полициските службеници, кој во меѓувреме е суспендиран и е во фокусот на постапката за утврдување одговорност, го извадил службениот пиштол и со извик „Полиција, застанете!“ се доближил до прозорецот на возилото. Во тој момент едно од момчињата му го истргнало пиштолот од рацете, по што возилото со голема брзина се оддалечиле од местото. Ова тврдење засега не е официјално потврдено, а токму начинот на кој оружјето завршило во автомобилот е едно од спорните прашања во случајот.

Првичната проценка на полицајците била дека лицата ќе се обидат да побегнат низ Кондово, но возилото се упатило кон автопатот. По него тргнале полициските службеници кои претходно се обиделе да го запрат, додека истовремено била активирана друга полициска екипа која била за заседа.

За време на бегството по автопатот, неофицијално, возачот изгубил контрола, удрил во заштитната ограда, по што автомобилот се превртел.

— реклама —

Токму по оваа сообраќајна несреќа следува делот од интервенцијата кој предизвика најмногу реакции. На снимките што ги објави ДУИ се гледа како полициски службеници физички ги удираат лицата при нивното совладување и приведување.

Според неофицијалната верзија до која дојде „Скопје1“, полицајците во тие моменти имале информација дека во возилото се наоѓа службениот пиштол кој претходно бил одземен од нивниот колега. Ова е една од околностите што треба да се утврдат во постапката, вклучително и дали постоела непосредна опасност за службениците и дали употребената сила била неопходна и пропорционална со оглед на настаните кои претходеле.

— реклама —

Двајцата млади, пак, изнесоа поинакви тврдења за одземањето на оружјето по одредени портали. Според нивната верзија, пиштолот завршил во автомобилот откако полицајците го скршиле стаклото. Но факт е дека сосе пиштолот во нивниот автомобил тргнале да бегаат.

Според досегашните неофицијални информации на „Скопје1“, кај двете лица не биле констатирани тешки телесни повреди, односно скршеници, туку лесни телесни повреди.

По интервенцијата, на социјалните мрежи биле објавени фотографии од двајца од вкупно шесте полициски службеници кои учествувале во акцијата. Покрај фотографиите, биле споделувани и нивните имиња, а според неофицијални и непотврдени информации, и адреси на живеење.

Во јавните објави се нашла и фотографија од еден од полицајците, кој приватно се занимава со бокс, направена со српски боксер. Фотографијата била споделена во контекст на настанот, иако самата по себе не утврдува ништо за постапувањето на полицискиот службеник за време на интервенцијата.

Според информации на „Скопје1“, по објавувањето на личните податоци биле упатувани закани кон суспендираните полициски службеници и нивните семејства. Заканите, според истите сознанија, биле пријавени. Засега нема официјални информации за исходот од овие пријави.

Случајот предизвика реакции и од двајца адвокати, кои јавно застанаа во одбрана на професионалниот интегритет на полицајците.

Адвокатот Јанаки Митровски упати порака до Министерството за внатрешни работи, предупредувајќи да не се избрзува со утврдувањето одговорност.

— реклама —

„Полицаецот што го сатанизиравте е еден од најчесните и најпосветените припадници на МВР. МВР нека не се залетува со пријави да не остане и без оние кои гинат за 40.000!“, напиша Митровски.

Реагираше и адвокатот Драган Пешевски, кој истакна дека, иако во професионалната работа често е на спротивната страна од полицијата, има позитивно искуство со службениците кои учествувале во акцијата.

„Иако сме скоро па секогаш на спротивните страни и немаме исти ставови по многу прашања, морам да признаам дека полициските службеници нападнати од сите страни се една од најуспешните, најкомпактни и најчесни екипи што ги познавам. Очигледно беа успешни и тргнаа бајаги дрога од улица, па на некој му присметаа. Па за да добие на фама, прво етнички пристап му дадоа на случајот“, напиша Пешевски, изнесувајќи го својот став.

Според неофицијалните информации на „Скопје1“, по настанот полицијата трагала по наркотиците за кои се сомнева дека биле исфрлени од возилото. Потрагата продолжила во вечерните и утринските часови, по што, според истите сознанија, биле пронајдени наркотични средства и доставени на вештачење. Официјална потврда за видот и количеството на евентуално пронајдената дрога засега нема.

На вештачење, според информациите, бил доставен и службениот пиштол. Со испитување на папиларните траги треба да се утврди кој ракувал со оружјето и дали на него постојат траги од лицата кои биле во автомобилот. Резултатите од ова вештачење би можеле да бидат важни за расветлување на спротивставените верзии за начинот на кој пиштолот завршил во возилото.

По приведувањето, двајцата млади се пуштени на слобода, додека полициските службеници за кои се води постапка се суспендирани.

Случајот стана актуелен во јавноста по реакциите на опозициските партии од албанскиот политички блок. Алијансата на Албанците побара утврдување одговорност за евентуалното пречекорување на полициските овластувања, додека ДУИ побара оставка од заменик-министерот за внатрешни работи Астрит Исени.

Министерството за внатрешни работи соопшти дека министерот Панче Тошковски наложил Одделот за внатрешна контрола, криминалистички истраги и професионални стандарди да го испита случајот и да утврди дали постои одговорност кај инволвираните полициски службеници.

Според Законот за полиција, употребата на средства за присилба мора да биде законита, соодветна и пропорционална, а дозволена е кога полициската задача не може да се изврши на друг начин. Законот предвидува употреба на средство со најмалку штетни последици, а присилбата не смее да служи за изнудување признание или изјава.

Член 89 ја уредува употребата на огнено оружје и ја ограничува на законски утврдени ситуации во кои тоа е апсолутно неопходно, вклучително и заштита на животот.

Овие одредби се важни за утврдување на околностите на случајот. Доколку се потврди дека службениот пиштол бил одземен од полицаец, ќе треба да се утврди каква опасност постоела во моментот на приведувањето.

Клучните одговори се очекуваат од внатрешната контрола, медицинската документација, вештачењето на оружјето, проверките за евентуално пронајдените наркотични средства и целосните видеоснимки од интервенцијата. Дотогаш, наводите за одземање пиштол, транспорт на дрога и пречекорување на полициските овластувања остануваат прашања што треба да се утврдат со докази.