Дваесетина ученици од Оркестарот на СУГС Гимназија „Орце Николов“ во септември ќе ја претставуваат Македонија во Њујорк, откако го освоија првото место на престижниот меѓународен натпревар International Youth Music Competition (IYMC). За да отпатуваат и да настапат пред светска публика, младите музичари апелираат за финансиска поддршка.
Како награда за освоеното признание, оркестарот доби покана за два концерта во Њујорк, каде ќе ја промовира македонската народна музика преку автентични аранжмани подготвени од шеф-диригентот Марко Балоски.
Во само две години постоење, оркестарот одржа четири големи концерти и успеа да ја доближи македонската народна музика до младата публика, покажувајќи дека традицијата може да се негува и на современ начин.
Од оркестарот посочуваат дека настапите во Њујорк се можност македонската култура да биде претставена пред меѓународна публика, но за реализација на патувањето неопходна е финансиска поддршка.
Затоа тие упатуваат повик до институциите, компаниите, банките, општествено одговорните организации и до сите кои можат да помогнат, да се вклучат во поддршката на проектот.
За повеќе информации или поддршка, заинтересираните можат да се обратат на електронската адреса: orkestar.orce@gmail.com или на телефонскиот број 071 972 352.
