Српскиот претседател Александар Вучиќ вечерва се огласи по инцидентите и судирите на улиците на Белград, повикувајќи ги демонстрантите на дијалог и порача дека државата ќе го воспостави јавниот ред и мир.
„После вечерашното насилство на блокадерите на улиците на Белград, уште еднаш ги повикувам на дијалог и се надевам дека ќе разберат дека и оние кои не мислат како нив се луѓе и граѓани на Србија“, напиша Вучиќ.
Тој додаде дека државата, како што рече, „одговорно ќе си ја заврши работата“.
„Државата својот дел од работата, исто како и вечерва, ќе го изврши одговорно и за кратко време ќе воспостави јавен ред и мир. На крајот, секогаш Србија победува“, порача српскиот претседател.
Изјавата на Вучиќ доаѓа по масовниот студентски протест во Белград, по кој дојде до судири меѓу дел од демонстрантите и полицијата, како и приведувања во центарот на градот.
