На теренска прес-конференција во Струмица, членката на Извршниот одбор на СДСМ, Тања Илијоска побара Владата итно да ги обештети земјоделците погодени од неодамнешното невреме во Струмичкиот регион, оценувајќи дека штетите се огромни и дека е неопходна брза финансиска помош за настраданите.
Илијоска изјави дека невремето предизвикало големи штети врз земјоделските површини, пластениците, домовите и земјоделската механизација не само во Струмица, туку и во општините Босилово, Ново Село и Василево.
Според Илијоска, за голем број семејства последиците од невремето значат загубена егзистенција и неизвесност, а Владата, како што рече, не реагира доволно брзо. Таа ја критикуваше надлежната институција и Министерството за земјоделство, оценувајќи дека наместо итни мерки, најавуваат проценки и следење на состојбата.
Од СДСМ обвинија дека Владата не покажува доволна грижа за земјоделците и потсетија дека, според нив, и претходно тие се соочувале со недостиг од конкретни мерки, намалени субвенции, ниски откупни цени и проблеми со пласманот на земјоделските производи.
Партијата посочи дека за време на владите предводени од СДСМ навремено се исплаќале обештетувања по природни непогоди, наведувајќи дека во 2018 година била донесена одлука за дополнителна помош, а во 2022 година биле исплатени средства за штети настанати во периодот од 2016 до 2018 година.
СДСМ побара Владата да одржи вонредна седница и да донесе одлука за итно обештетување и финансиска помош за земјоделците погодени од невремето. Воедно, од партијата повикаа да се изработи долгорочна стратегија за адаптација на земјоделството кон климатските промени.
„Без земјоделци нема домашно производство, ниту иднина за македонското земјоделство“, порачаа од СДСМ.
