(Видео) Јанчев: Да, бев политички лицемерен кога реков „дај Боже да бидеме како Заев“

Во најновата епизода на „Претрес со Ландов“, градоначалникот на Кавадарци и сопственик на Кожувчанка, Митко Јанчев, отворено призна дека изјавата од 2020 година — „Дај боже сите да бидеме како Заев“ — била „политички лицемерна“, но, како што рече, направена во интерес на граѓаните и општината.

„Лицемерно. Е, можам да кажам политички лицемерно за еден политичар, не за граѓанин. Од тоа добив проект од милион ипол евра за граѓаните. Една реченица, милион ипол евра проект. Ако е во интерес на граѓаните, би го направил пак“, рече Јанчев во разговор со новинарот Кристијан Ландов.

— реклама —

На прашањето дали тогашниот премиер Зоран Заев му сугерирал да ја каже таа реченица, Јанчев одговори дека идејата била негова и дека целта му била Кавадарци да добие проект што првично не бил планиран за општината.

— реклама —

„Проектите беа поделени — 35 милиони евра. Кога Кавадарци се јави, сите беа затворени. Како градоначалник успеав да воспоставам контакт со премиерот и го замолив да нè вклучи во делот од програмата“, објасни Јанчев.

Разговорот доби дополнителна тежина кога Ландов потсети дека токму Заев бил премиерот под чија власт во 2017 година Јанчев беше приведен од полицијата.

— реклама —

„Викавте ‘дај боже сите да бидеме како Заев’, кога истиот човек ве апсеше со полиција и ве претресуваше со војска. Господине Јанчев, вашите калкулации изгледаат премногу флексибилни“, му рече Ландов.

Јанчев, пак, одговори дека за него политичката култура значи почит кон институциите и функцијата, а не нужно кон личноста.

„Баба ми ми велеше: ‘Синко, тој ти е претседател – имај почит’. Заев бил господин додека бил премиер. Сега нема потреба да му се обраќам така, но ако го видам, ќе му речам ‘господине Заев, како сте’ – од воспитување, не од политика“, рече Јанчев.

Овој дел од интервјуто повторно го отвори прашањето за прагматизмот и моралните граници во македонската политика, особено кога јавните изјави на функционерите се во спротивност со нивното минато. Погледнете го во целост: