(Видео) Јована Станковска покажа дека за неа нема граници: се бори со церебрална парализа, го положи последниот испит на Правен факултет!

Јована Станковска од Куманово, млада девојка која живее со церебрална парализа, го положи последниот испит на Правниот факултет при Универзитетот „Св. Кирил и Методиј“ во Скопје. Радосната вест ја сподели самата, означувајќи го крајот на едно важно поглавје од својот живот, исполнето со учење, труд и бројни предизвици.

„Денес го затворив едно од најубавите поглавја во животот, го положив и последниот испит од Правен факултет на УКИМ. Продолжуваме и понатаму со сите животни предизвици“, напиша Јована.

Нејзината приказна ѝ е позната и на публиката на „Претрес со Ландов“. Нејзиниот татко, Антонио Станковски, поранешен припадник и старешина во безбедносните сили, во гостувањето во поткастот отворено зборуваше за семејните предизвици, лекувањето на Јована и секојдневната поддршка што ѝ ја дава.

— реклама —

Во еден од најемотивните моменти од разговорот, Станковски зборуваше за товарот што го носел како татко, додека истовремено имал големи професионални одговорности.

Во истото гостување откри дека Јована посетува третмани во странство и дека семејството се соочува со значителни финансиски трошоци за нејзиното лекување.

— реклама —

Но, особено впечатлив беше делот во кој раскажа дека секојдневно ја придружува својата ќерка на факултет, а трошоците за патувањата ги покрива семејството.

„Секојдневно што патувам на факултет со девојчето,...“, рече Станковски во разговорот, посочувајќи дека државната поддршка не е доволна за потребите со кои се соочуваат ваквите семејства.

Во „Претрес“ беше отворена и темата за пристапноста до образованието за лицата со попреченост, особено за оние кои поради здравствени, финансиски или транспортни пречки потешко можат редовно да посетуваат настава.

— реклама —

Денеска, Јована има нова причина за радост. Испитите што ги полагала, патувањата до факултетот и сите предизвици што ги носело студирањето се зад неа, барем кога станува збор за исполнувањето на испитните обврски.

Нејзиниот успех е и потсетување на значењето на пристапното високо образование, семејната поддршка и еднаквите можности за студентите со попреченост.

— реклама —

А Јована, наместо да стави точка на својата приказна, во објавата најави дека продолжува понатаму, подготвена за новите животни предизвици.