По спектакуларната изведба на „Кармина Бурана“ во Градскиот парк во Скопје, која предизвика бројни позитивни реакции во јавноста, Синдикатот на културата на Република Македонија (СКРМ) реагира дека во јавните објави за настанот бил изоставен придонесот на Хорот на Националната опера и балет.
Од СКРМ посочуваат дека концертот, кој претставуваше завршница на трилогијата настапи, реализирани во Солун, Софија и Скопје, оставил силен впечаток кај публиката и уште еднаш ја потврдил моќта на културата да обединува.
Сепак, од Синдикатот забележуваат дека во голем број јавни објави, вклучително и од претставници на државниот врв, не бил споменат Хорот на Националната опера и балет, иако, како што велат, токму хорот е еден од клучните носители на делото.
„Без хорот, ‘Кармина Бурана’ останува без глас, а нејзината драматичност, моќ и величественост не би можеле целосно да се почувствуваат. Гласовите на уметниците беа тие што ја пренесоа емоцијата до секој присутен“, наведуваат од СКРМ.
Оттаму оценуваат дека ова може да се смета како пропуст во протоколот или во јавната комуникација, но истовремено посочуваат дека случајот повторно ја отвора темата за вреднувањето на уметничкиот труд и положбата на културните работници.
„Не можеме да се гордееме со големи културни достигнувања, а истовремено да ги правиме невидливи оние што ги создаваат. Не можеме да аплаудираме на спектаклот, а да молчиме за достоинството на луѓето кои со својот труд, знаење и посветеност го овозможуваат“, истакнуваат од Синдикатот.
Според СКРМ, нивната борба за колективен договор во културата не е само прашање на плати и работнички права, туку и борба за признавање на вредноста на уметничкиот труд и достоинството на сите културни работници.
„Ако навистина сме горди на ‘Кармина Бурана’, тогаш треба да бидеме горди и на луѓето што ја создадоа. Културата не ја создаваат функциите, министрите или протоколите. Културата ја создаваат уметниците, а без културни работници нема уметност“, порачуваат од СКРМ.
Од Синдикатот додаваат дека остануваат горди на своите колеги, кои, како што велат, уште еднаш покажале дека културата е суштинска потреба на едно општество и важен дел од националниот идентитет.
