На прес-конференција, пратеничката Бисера Костадиновска-Стојчевска изјави дека по иницијатива на пратеничката група на СДСМ и Коалицијата, денеска во Собранието започна надзорната расправа за примената на Законот за употреба на македонскиот јазик. Од СДСМ велат дека целта е да се утврдат причините за, како што наведуваат, нефункционирањето на Законот и институционалните пропусти во неговата примена.
На прес-конференција, пратеничката Бисера Костадиновска-Стојчевска истакна дека иницијативата за одржување на расправата била поднесена на 23 март, но, според неа, поради одолговлекување од страна на власта и Собранието, наместо во мај, расправата започнала дури денес.
„Законот беше донесен во јануари 2024 година, а освен именувањето директорка на Инспекторатот во април 2025 година, практично ништо друго не е реализирано. Вработени се двајца инспектори пред половина месец, кои допрва треба да поминат обука за да можат да вршат надзор“, рече Костадиновска-Стојчевска.
Таа оцени дека и покрај тоа што Законот е донесен пред повеќе од една година и половина, неговите клучни одредби сè уште не се применуваат во пракса и дека институциите не ги исполнуваат законските обврски.
Костадиновска-Стојчевска информираше дека на надзорната расправа се поканети претставници на надлежните институции, академската заедница, стручната јавност и медиумскиот сектор, со цел да се утврди каде е застојот во примената на Законот.
Воедно, таа ги повика сите поканети да го потврдат своето присуство за расправата да може да продолжи и да заврши со конкретни заклучоци.
Според неа, Законот бил донесен по едногодишна јавна дебата и со широк политички консензус, поради што, како што рече, заслужува доследна примена.
„Овој закон заслужува да функционира. Требаше да обезбеди вработување лектори по македонски јазик во институциите, училиштата, медиумите и издавачките куќи, како и функционален инспекторат за македонскиот јазик, но тоа сè уште не е реализирано“, изјави Костадиновска-Стојчевска.
Таа додаде дека, според СДСМ, и по повеќе од една година од донесувањето на Законот нема суштински напредок во неговата имплементација.
