Македонецот Кристијан Бајовски е нов носител на Гинисов светски рекорд откако успеал да направи неверојатни 1.257 склекови за само еден час, носејќи ранец тежок околу девет килограми.
Бајовски го поставил рекордот во дисциплината „најмногу склекови со градите до подот со ранец од 9 килограми за еден час“ во машка конкуренција.
Според сертификатот издаден од Guinness World Records, рекордниот обид бил изведен во Скопје на 28 јуни 2026 година, а Бајовски во предвидените 60 минути успеал да направи вкупно 1.257 правилни повторувања.
Предизвикот дополнително го отежнува фактот што во текот на целиот обид Бајовски носел дополнително оптоварување од околу девет килограми.
За резултатот официјално да биде признаен како светски рекорд, повторувањата морале да бидат изведени според строго утврдените правила и критериуми на Гинисовите светски рекорди.
Со официјалната потврда, Бајовски сега е запишан како носител на светскиот рекорд во оваа дисциплина, а рекордот поставен во Скопје доби место меѓу достигнувањата регистрирани од Guinness World Records.
