Околу 300 килограми марихуана се запленети, а повеќе лица се уапсени во голема меѓународна полициска операција насочена против криминална група осомничена за трговија со дрога. Акцијата се спроведува координирано во повеќе држави, а истражните активности сè уште траат.
Од македонска страна во операцијата учествува Министерството за внатрешни работи преку Одделот за криминалистичка полиција, во соработка со мешовити полициски тимови од Косово и Грција. Истражните активности се водат во координација со надлежните обвинители од трите земји.
Операцијата е резултат на подолготрајна размена на оперативни информации и соработка меѓу полициските и правосудните органи на Македонија, Косово и Грција. Во текот на истрагата биле следени активностите на групата, по што биле преземени координирани полициски дејствија.
Во досегашниот тек на акцијата се уапсени неколку лица за кои постои сомнение дека биле дел од меѓународната криминална група, а запленети се околу 300 килограми марихуана за која се сомнева дека била наменета за нелегална трговија.
Операцијата не е завршена. Истражните дејствија продолжуваат во Македонија и Косово, а надлежните работат на целосно расчистување на случајот, утврдување на улогата на секое од опфатените лица и откривање на начинот на кој функционирала криминалната група.
Поради активната истрага, засега не се објавуваат дополнителни детали за точниот број на лица опфатени со постапката, нивните улоги и начинот на дејствување на групата.
Повеќе информации за резултатите од меѓународната операција се очекуваат по завршувањето на истражните дејствија.
