На денешната прес-конференција, портпаролот на партијата Валентин Манасиевски обвини дека недонесувањето на новиот Изборен законик е резултат на, како што наведуваат, блокада од страна на СДСМ, Левица и ДУИ, оценувајќи дека со тоа е попречен напредокот на државата.
Манасиевски изјави дека Изборниот законик требало да биде усвоен не само поради барањата на политичките партии, туку и заради вградување на препораките на ОБСЕ и ОДИХР, како и затоа што претставува дел од Реформската агенда.
Според Манасиевски, од десетте предвидени реформи, девет се реализирани, а единствената што останала е токму Изборниот законик, за што ја обвини опозицијата.
„Ова е директен показател дека, кога имаат можност, СДСМ, Левица и ДУИ ќе го блокираат напредокот на државата“, рече Манасиевски.
Тој оцени дека опозициските партии не се заинтересирани за усвојување на новиот Изборен законик, туку, како што тврди, сакаат на следните избори да се претстават како оштетени поради тоа што законот не бил донесен.
Од ВМРО-ДПМНЕ тврдат дека поради недонесувањето на Изборниот законик е пропуштен рокот поврзан со Планот за раст, што, според партијата, може да влијае врз средствата што државата би ги добила преку оваа европска иницијатива.
Манасиевски предупреди дека, доколку не се постигне договор, следните избори би можеле да се одржат според постојниот Изборен законик.
