Со денови траат масовни протести во Албанија поради плановите на Џаред Кушнер, зет на американскиот претседател Доналд Трамп, за изградба на луксузни туристички комплекси на заштитеното крајбрежје Звернец и на ненаселениот остров Сазан.
Демонстрантите во Тирана се судрија со полициски кордони пред зградата на владата, обвинувајќи го премиерот Еди Рама дека го „продава националното богатство“ и дека неговата влада нетранспарентно ги изменила законите за да овозможи изградба во заштитено природно подрачје.
Проектот го развива американската инвестициска компанија „Афинити партнерс“, основана од Кушнер. Планот предвидува изградба на луксузен туристички комплекс во чувствителното крајбрежно мочуриште Вјоса-Нарта, живеалиште на фламинга, морски желки и други заштитени видови. Само инвестицијата на островот Сазан се проценува на околу 1,4 милијарди евра.
Против проектот уште претходно се изјаснија десетици еколошки организации, предупредувајќи дека изградбата може сериозно да ја загрози биолошката разновидност во едно од ретките недопрени подрачја во Европа.
Протестите дополнително се интензивираа откако инвеститорите поставиле бодликава жица и го ограничиле пристапот до плажите во областа. Еколошки активисти пријавиле и траги од тешка механизација и булдожери кои интервенирале во крајбрежните песочни дини.
За време на протестите биле регистрирани и инциденти, при што приватни обезбедувачи физички нападнале дел од демонстрантите. По инцидентот, албанските власти суспендирале неколку полицајци и им ги одзеле лиценците на две приватни компании за обезбедување.
Албанското Специјално обвинителство за борба против корупција и организиран криминал (СПАК) отвори истрага за потеклото на средствата користени при купувањето и препродажбата на земјиштето поврзано со проектот.
Премиерот Рама ги брани инвестициите, оценувајќи ги како можност за развој на туризмот и привлекување странски капитал. Тој ги отфрли обвинувањата дека проектот добил привилегиран третман заради неговите односи со администрацијата на Трамп.
Кушнер ги претставува плановите како една од најголемите приватни инвестиции во историјата на регионот, со амбиција Албанија да стане една од најатрактивните туристички дестинации на Медитеранот. Сепак, демонстрантите најавија дека протестите ќе продолжат сè додека владата не ги повлече спорните проекти.
