Жителите на американската држава Масачусетс вчера попладне почувствувале силен звук налик на експлозија и потрес на тлото, откако низ атмосферата прелетал метеор со огромна брзина.
Според НАСА, станувало збор за исклучително светол метеор, познат како огнена топка, кој се движел со брзина од околу 120.000 километри на час.
Научниците процениле дека при неговото распаѓање во атмосферата била ослободена енергија еквивалентна на експлозија од околу 300 тони ТНТ.
„Се чини дека метеорот се распаднал на височина од околу 64 километри над североисточниот дел на Масачусетс и југоисточниот дел на Њу Хемпшир“, соопшти НАСА.
Од агенцијата нагласиле дека појавата не е поврзана со ниту еден активен метеорски дожд и дека станува збор за природен вселенски објект, а не за вселенски отпад или сателит кој повторно влегол во атмосферата.
Локалната служба за управување со вонредни состојби соопштила дека примила бројни пријави од граѓани за силен удар и тресење на тлото во источниот дел на државата, но немало потреба од интервенција на полицијата или пожарникарите.
Од Американскиот геолошки институт објасниле дека најверојатно станува збор за силен звучен удар предизвикан од болид – особено светол метеор што експлодирал во атмосферата.
Институтот потврдил дека не е регистриран земјотрес и дека нема докази оти некој дел од метеорот паднал на земјата.
