Претседателот на СДСМ, Венко Филипче, на денешната прес-конференција оцени дека по речиси две години владеење на коалицијата предводена од ВМРО-ДПМНЕ, граѓаните се соочуваат со понизок животен стандард, повисоки долгови и застој во европските интеграции, додека власта, според него, вниманието го пренасочува кон политички конфликти и поделби.
На денешната прес-конференција, Филипче изјави дека Владата не ги исполнила ветувањата дадени пред граѓаните и дека резултатите од нејзиното работење се далеку под очекувањата.
„Оваа власт нема визија, капацитет ниту знаење за да ги менаџира процесите во државата. Од ветеното пред граѓаните не се реализирани ниту 20 проценти, а последиците ги чувствуваат сите – од семејните буџети до вкупната економија“, рече Филипче.
Тој посочи дека во изминатиот период единствено се зголемиле задолжувањата на државата, додека животниот стандард опаѓа, а младите сè почесто ја напуштаат земјата во потрага по подобри услови за живот.
Според лидерот на СДСМ, недостатокот на резултати во економијата и подобрувањето на квалитетот на животот ја тера власта да користи реторика базирана на конфликти и поделби.
„Кога нема резултати таму каде што граѓаните најмногу ги очекуваат, тогаш се создаваат надворешни непријатели и се бараат внатрешни виновници. Тоа е модел што го користат популистичките влади за да го одвлечат вниманието од реалните проблеми“, изјави Филипче.
Тој додаде дека темата за идентитетот намерно се користи за прикривање на неуспесите во економијата и европските интеграции, оценувајќи дека таквиот пристап создава страв и дополнителна изолација на државата.
Филипче ги повика граѓаните критички да ги оценуваат политиките на власта и да не подлегнуваат на, како што рече, националистичка и популистичка реторика која не нуди решенија за секојдневните проблеми.
