Русија ноќеска го изведе еден од најсмртоносните напади врз Киев и неговата околина оваа година, при што загинаа најмалку 21 лице, а десетици се повредени. Во масовниот напад со балистички ракети и беспилотни летала беа погодени станбени згради и цивилна инфраструктура.
Според украинското воено воздухопловство, руските сили употребиле 24 балистички ракети, четири противбродски проектили и 115 дронови. Украинската противвоздушна одбрана успеала да собори 98 беспилотни летала, но не и ниту една од 24-те балистички ракети.
Спасувачките екипи со часови ги пребарувале урнатините на погодените станбени објекти, железничката станица и складиштата во и околу Киев, додека на повеќе локации избувнале пожари. Напади биле регистрирани и во регионите Запорожје, Доњецк и Харков.
Украинскиот претседател Володимир Зеленски изјави дека жртвите можеле да бидат избегнати доколку западните сојузници навреме ги испорачале потребните ракети за американските системи „Патриот“, кои, според него, се единствените способни да пресретнуваат балистички ракети.
Тој нагласи дека испораките на противвоздушна муниција оваа година се значително намалени, поради што Украина повторно упати апел за итно зајакнување на својата воздушна одбрана.
Од друга страна, руското Министерство за одбрана соопшти дека цел на нападите биле воени логистички центри, складишта за опрема и капацитети за производство на дронови во регионот на Киев. Москва, исто така, тврди дека погодила три товарни брода во близина на Одеса, за кои наведува дека превезувале оружје, додека руските власти објавија и дека украински дрон предизвикал пожар во складиште во Тулската област.
Киев и Москва продолжуваат меѓусебно да се обвинуваат за напади врз цивилни цели.
