Најмалку 55 лица загинаа, а десетици се повредени во силна експлозија што се случи во селото Каунг Тат, во државата Шан во Мјанмар, во близина на границата со Кина.
Според локални извори, меѓу жртвите има 25 жени и 30 мажи, додека спасувачките екипи продолжуваат да ги пребаруваат урнатините во потрага по преживеани.
Областа е под контрола на Таанската национална ослободителна армија, бунтовничка група која води вооружени судири со воената хунта во Мјанмар. Од организацијата соопштија дека до експлозијата дошло поради детонација на материјали што се користат во рударството и каменоломите.
Жителите опишуваат сцени на хаос и паника. Еден од нив навел дека многумина првично помислиле дека станува збор за воздушен напад. Според сведоштвата, меѓу загинатите има и деца, а оштетени се стотици куќи, при што речиси цела населба била разурната.
„Само поради среќа ми го спаси животот мобилниот телефон. Седев во спалната соба, јадев и гледав во телефонот. Да бев во кујната, веројатно денес немаше да бидам жив“, изјавил еден жител.
Друга жителка, која претрпела полесна повреда на ногата и останала без дом, раскажала дека луѓето плачеле и ги повикувале своите родители во моментите по експлозијата.
„Изгледаше како крај на светот“, изјавила таа, прашувајќи зошто објект со експлозивен материјал бил лоциран во близина на населено место. Таа побарала целосно објаснување од властите за причините за несреќата.
