Најмалку 62 лица загинале во поплавите и невремето што во изминатите денови ја погодиле северната индиска сојузна држава Утар Прадеш.
Локалните власти соопштија дека уште 46 лица биле повредени, а повеќе од 1.000 куќи биле оштетени во тридневното невреме, кое предизвикало поплави во неколку области.
Во делови од државата, меѓу кои и главниот град Лакнау, денеска се затворени училиштата. Спасувачките служби евакуираат жители од загрозените подрачја и ги префрлаат на побезбедни места, додека граѓаните се повикуваат да не патуваат доколку тоа не е неопходно.
Според регионалниот метеоролошки центар во Лакнау, се очекува дождовите од денеска да ослабнат, бидејќи системот над Бенгалскиот Залив ја губи силата. Слаби врнежи во источните и западните делови на државата се можни и утре.
Поплави има и во источната индиска држава Одиша, каде што властите евакуирале повеќе од 75.000 луѓе.
Во соседен Непал, пак, во несреќи поврзани со невремето од четврток до недела загинало 21 лице, соопшти националната агенција за управување со катастрофи. Пет лица се водат како исчезнати, а уште пет биле повредени. Во поплавите и одроните биле оштетени 194 куќи.
Непал сè уште се опоравува од катастрофалните поплави во август, во кои загинале повеќе од 1.400 луѓе, додека речиси 6.000 лица и понатаму се водат како исчезнати.
