(Видео) Невреме ги парализира Канарските Острови: Цел остров остана без струја, активиран кризен план

Силното невреме што ги зафати Канарските Острови во Шпанија предизвика прекин на снабдувањето со електрична енергија на туристичкиот остров Ла Палма, додека соседниот Тенерифе беше изненаден од снежни врнежи.

Според регионалните власти, во понеделникот наутро Ла Палма останала без струја по обилните дождови, при што во одделни области за само еден час наврнале до 30 литри дожд на квадратен метар.

— реклама —

Поради најавеното екстремно невреме, уште на полноќ бил прогласен највисок степен на предупредување за обилни врнежи. Активиран е и кризен план, кој предвидува следење на состојбата, координација на службите за итни случаи и процена на можните нарушувања во работата на јавните служби.

— реклама —

Во меѓувреме, снегот на Тенерифе доведе до затворање на пристапот до врвот на вулканот Теиде, една од најпознатите природни атракции на островот. Властите предупредија дека искачувањето е дозволено само за планинари со соодветна зимска опрема, бидејќи патеките на поголема надморска височина се опасни и тешко проодни.

— реклама —

Во пониските делови на Тенерифе времето е значително попријатно. За понеделник била прогнозирана највисока температура од 28 степени, а за вторник и среда се очекувале 26 степени.

Невремето и снежните врнежи следуваат неколку недели по двата земјотреса регистрирани во морето кај островот Лансароте. Посилниот, со магнитуда од 3,1 степени според Рихтеровата скала, бил регистриран на 25 октомври во 18:08 часот, западно од островот. Вториот земјотрес, со магнитуда од 2,6 степени, се случил околу 14 часа претходно, на длабочина од приближно 31 километар.

— реклама —

Шпанскиот Национален географски институт ја означил локацијата на потресите како област во Атлантскиот Океан кај Канарските Острови. Сеизмичката активност во регионот не е невообичаена, но повеќето земјотреси се со слаб интензитет и обично не ги чувствуваат жителите и туристите.