Новак Ѓоковиќ оваа година на Ролан Гарос не е фокусиран само на освојување на нова титула, туку и на добра атмосфера и забава надвор од теренот.
Српскиот тенисер се надева дека ќе стигне до својата 25. гренд слем титула во кариерата, но изминативе денови во Париз привлече внимание и со својот стил, роденденската прослава и видеата со семејството.
Ѓоковиќ го прослави својот 39. роденден во Париз, а организаторите на турнирот му приредија изненадување со црна торта украсена со златни свеќички. Прослава организираше и неговиот главен спонзор Lacoste, кој му подготви торта од колачиња во форма на бројките 3 и 9. Меѓу гостите бил и Данил Медведев.
Тенисерот се појави во лежерна комбинација со широки панталони и јакна, а на социјалните мрежи доби бројни комплименти за стилот.
На теренот дополнително внимание привлече со јакна во боја на цигла, на чиј грб бил исцртан лик на волк, за кој Ѓоковиќ кажа дека е неговото „духовно животно“. Јакната била украсена и со вистинска глина од терените на Ролан Гарос.
Сепак, најмногу реакции предизвика видеото што тенисерот го сподели со својата ќерка Тара, на кое двајцата танцуваат на победничката евровизиска песна „Бангаранга“.
