Најмалку 11 ученици се повредени во утринскиот напад со огнено оружје во близина на средно училиште во турскиот град Тургутлу, во провинцијата Маниса. Двајца од повредените се во тешка состојба, а осомничениот, малолетен ученик, бил приведен кратко по нападот.
Пукањето се случило околу 8 часот по локално време во близина на Средното стручно и техничко училиште „Инџи Узмез“. Првичните информации беа дека има осум повредени, но бројот подоцна се зголемил на 11.
Според турските медиуми, напаѓачот дошол вооружен со пушка, пукал кон луѓето во близина на училиштето, а потоа се обидел да побегне пеш. Полицијата брзо го пронашла и го привела.
Во рамки на истрагата биле приведени и родителите на осомничениот, како и неговиот дедо. Надлежните проверуваат како малолетникот дошол до оружјето и на кој начин било чувано. Се испитува и дали нападот бил поврзан со претходни проблеми меѓу ученици.
Мотивот засега не е утврден, а обвинителството во Тургутлу започнало истрага.
По пукањето, голем број родители пристигнале пред училиштето за да дознаат што се случило со нивните деца. Според турските медиуми, дошло и до туркање меѓу родители и полицијата, која не им дозволувала да влезат во училишната зграда.
Ова е трет сериозен вооружен напад поврзан со училиште во Турција годинава. По претходните напади во април, турските власти најавија засилување на безбедносните мерки во образовните установи.
