Новороденче било пронајдено живо во канта за хигиенски отпад во тоалет за лица со попреченост на меѓународниот аеродром во Пенанг, Малезија. Детето го открила чистачка откако слушнала плачење што доаѓало од кантата.
Момчето било пронајдено на 31 август, со сè уште прикачени папочна врвца и плацента, поради што полицијата се сомнева дека било родено непосредно пред да биде оставено во тоалетот.
На снимките од спасувањето што се проширија на социјалните мрежи се гледа како вработени на аеродромот внимателно го вадат бебето од кантата обложена со пластична кеса.
Новороденчето веднаш било пренесено во болница во Пенанг, а неговата здравствена состојба била оценета како главно добра.
По прегледувањето на снимките од безбедносните камери, полицијата уапсила млада Малезијка и 22-годишен државјанин на Мјанмар, кој работел како обезбедување. Кај мажот не биле пронајдени важечки документи за престој во земјата.
Полицијата засега не потврдила дали уапсените се родители на детето. Од нив биле земени примероци за форензичко испитување со кое треба да се утврди дали се поврзани со новороденчето.
Случајот се истражува според одредба од малезискиот Кривичен законик која се однесува на напуштање дете помладо од 12 години. За ова кривично дело е предвидена казна до седум години затвор, парична казна или двете казни.
