Македонскиот автомобилист Марко Блажевски повторно се искачи на највисокото место на победничкиот подиум, откако триумфираше на патеката Валелунга во Италија во рамки на Европскиот Renault Cup.
Со освоеното прво место, Блажевски дополнително ја зголеми својата предност во генералниот пласман. До крајот на сезоната остануваат уште три трки, а македонскиот возач во моментов има повеќе од 30 бодови предност пред конкуренцијата.
По неговиот триумф, на патеката во Италија одекна македонската химна, додека македонското знаме се најде на врвот на победничкиот подиум.
Блажевски по трката порача дека фокусот останува целосно насочен кон освојување на титулата.
„Уште една победа и уште еден огромен чекор кон титулата. Сега остануваат уште три трки. Фокусот е на титулата. Нема опуштање“, изјави македонскиот автомобилист.
Со новиот успех, Блажевски ја продолжува борбата за европската титула, која во завршницата на сезоната се обидува да ја донесе во Македонија.
