(Видео) Организацискиот секретар на СДСМ за 27 април: „Не се слагам дека тоа е тероризам“

„Не се слагам дека е тероризам“, изјави организацискиот секретар на СДСМ, Зоран Трифуновски-Жаба, во „Претрес со Ландов“, во разговорот за настаните од 27 април и за казните на осудените. Тој се изјасни за помирување и кажа дека би сведочел доколку има повторно судење.

Трифуновски, кој раскажа дека таа вечер влегол во Собранието за да помогне во извлекувањето на своите сопартијци, настанот го опиша како еден од потрагичните во поновата историја. Сепак, се спротивстави на квалификацијата тероризам и на висината на казните за дел од осудените.

— реклама —

„Не се слагам дека е тероризам“, рече тој, додавајќи дека не смета оти е коректно тие луѓе и натаму да бидат во затвор.

Посебно зборуваше за поранешни колеги од безбедносните структури со кои работел. Според него, можно е да потфрлиле во професионалните обврски, но не требало да добијат, како што ги нарече, драконски казни, додека иницијаторите и организаторите останале без последици.

— реклама —

Од актуелната власт побара храброст за помирување, повикувајќи се и на примерот со помилувањата од Доналд Трамп во САД.

Водителот Кристијан Ландов повеќепати го праша дали конкретно поддржува повторно судење, посочувајќи дека барањето на дел од осудените е да ја докажат својата невиност, а не само да бидат ослободени.

— реклама —

Трифуновски најпрво зборуваше за изнаоѓање модус за помирување и ослободување, а потоа кажа дека би сведочел доколку има повторно судење. Истовремено нагласи дека за повторување на постапката се потребни нови докази и дека, доколку ги имаат, осудените треба да побараат ново судење.

На прашањето како би реагирал СДСМ доколку биде дозволено повторно судење, Трифуновски нагласи дека го кажува својот личен став.

— реклама —

Како влегол во Собранието на 27 април, што видел внатре и зошто денес ја оспорува квалификацијата тероризам? Неговото сведоштво и соочувањето со прашањата за повторно судење — гледајте го целиот „Претрес“: