(Фото) Осум часа декомпресија по историскиот подвиг на Матка – нуркачот откри детали од експедицијата

Подводната пештера Врело во кањонот Матка стана најдлабоката подводна пештера во светот истражена од човек-нуркач, откако полскиот истражувач Бартломеј Питала се спушти на длабочина од 338 метри, заедно со македонските нуркачи. Историското нуркање било изведено на 16 октомври, во рамки на меѓународна експедиција во која учествувале нуркачи и експерти од Полска, Македонија и Италија.

Питала, кој по завршувањето на експедицијата јавно ги сподели деталите од подвигот, откри дека дури и на 338 метри пештерата продолжувала да се спушта надолу, но одлучил да го прекине истражувањето поради ограничувањата на опремата и безбедносните ризици.

— реклама —

„На 338 метри одлучив да не ги тестирам дополнително границите на опремата. Преминот и понатаму стрмно се спушташе надолу. Патот понатаму беше очигледен“, напиша нуркачот.

Експедицијата, реализирана од 10 до 17 октомври, била резултат на повеќемесечни подготовки на тимовите BAD Exploration Team и нуркачкиот клуб „Врело“ од Матка. Минатата година истражувањето завршило на 287 метри, а годинашната цел била да се надмине границата од 300 метри.

За време на последното нуркање, Питала најпрво се спуштил до 212 метри, а потоа продолжил низ подводните премини до претходно неистражениот дел од пештерата. По преминувањето на 300 метри, стигнал до 315 метри, со што, според неговото сведоштво, Врело станала најдлабоката подводна пештера истражена од човек. Неколку секунди подоцна ја достигнал и конечната длабочина од 338 метри.

„Бев најдлабокиот човек на Земјата“, напиша Питала, опишувајќи го моментот кога ја достигнал најголемата длабочина.

— реклама —

Но, вистинскиот предизвик следувал при враќањето. Поради екстремната длабочина, нуркачот морал да помине повеќе од осум часа во декомпресија, односно контролирано и постепено искачување за да се намали ризикот од сериозни здравствени последици.

Тој наведува дека целата декомпресија ја поминал под вода и дека на површината излегол самостојно, без здравствени проблеми.

Експедицијата била обезбедувана со хеликоптер подготвен за итна евакуација, три брзи чамци и припадници на Специјалната антитерористичка единица „Тигар“, медицинска екипа, како и специјалист за хипербарична медицина. Во пештерата биле поставени повеќе од 25 резервни боци за дишење, а во последното нуркање учествувале и седум нуркачи за поддршка.

— реклама —

Питала посебно ја истакна поддршката од македонските институции и од претседателката Гордана Сиљановска-Давкова, под чие почесно покровителство се одвивала експедицијата.

„Поддршката, љубезноста и топлото добредојде што ги добивме во Северна Македонија, од нејзините луѓе, институции, владата и нашите пријатели, беа незамисливи. Убеден сум дека поддршка од вакви размери тешко би добиле во која било друга земја“, напиша тој.

Во својата објава испрати и посебна порака до македонската јавност.

„Луѓето во Македонија заслужија овој подвиг да се случи токму на нивна земја“, порача Питала.

Тој им се заблагодари на нуркачкиот клуб „Врело“, припадниците на „Тигар“, хеликоптерската единица на МВР, медицинските служби и сите учесници во експедицијата.

Меѓународниот тим најави дека дополнително ќе објави видеоснимки, фотографии, нови мапи и тридимензионална визуелизација на досега неистражените делови од пештерата.

Иако достигнатата длабочина од 338 метри претставува исклучително достигнување, истражувањето не го открило крајот на пештерата Врело. Според Питала, подводниот премин продолжува уште подлабоко, оставајќи простор за нови истражувања.