Спасувачките тимови во Лаос пронашле петмина селани живи во поплавена пештера, една недела откако останале заробени поради обилни дождови и одрони.
Двајца мажи кои биле со нив сè уште се водат како исчезнати, соопштиле спасувачките тимови од Лаос и Тајланд кои учествуваат во операцијата.
Седумчлената група од централната провинција Ксајсомбун минатата среда влегла во пештерата во потрага по злато и диви животни, но невремето го блокирало излезот.
Според информациите, пештерскиот систем се протега длабоко под земја и е исклучително тесен. Спасувачите наведуваат дека некои комори се широки само околу 50 сантиметри.
Снимките што спасувачките екипи ги споделија со јавноста прикажуваат нуркачи како се пробиваат низ тесни и калливи премини кои биле речиси целосно под вода.
Бункхам Луанглат од лаоската организација „Спасувачки волонтери за народот“ изјави дека потрагата по исчезнатите лица продолжува.
„Сè уште се тресам. Нашиот тим успеа“, рекол тој во гласовна порака.
