Густ чад со недели го покрива индонезискиот дел од Борнео, каде што пожарите уништија десетици илјади хектари земјиште и прашума, а загадениот воздух веќе се шири и кон соседните Малезија и Сингапур.
Во провинцијата Западен Калимантан здравствените служби бележат драматичен раст на бројот на пациенти со респираторни проблеми. Од јули, неделно медицинска помош побарале околу 5.000 луѓе, што е десетпати повеќе од просекот во првата половина на годината.
Поради густиот чад видливоста на места е сведена на само неколку метри. Дел од училиштата ја прекинале наставата, додека родителите бараат воведување онлајн настава, особено поради ризикот за децата, постарите лица и бремените жени.
Пожарите во Калимантан се повторлив проблем, а често се поврзуваат со намерното палење на земјиштето за негово расчистување и создавање плантажи со палмино масло. Властите предупредуваат дека овогодишниот силен феномен Ел Нињо може дополнително да ја влоши ситуацијата. Сушната сезона трае до октомври, а позначајни врнежи се очекуваат дури во ноември.
Проблемот веќе има регионални последици. Малезија и Брунеи најавија дека ќе го покренат прашањето на состанокот на АСЕАН, бидејќи чадот се шири преку границите. Во малезиската држава Саравак се затворени речиси 600 училишта, додека Сингапур е во состојба на подготвеност.
Индонезиските власти презедоа мерки против осомничените предизвикувачи на пожарите. Полицијата уапсила 72 лица на Борнео и Суматра, кои се сомничат дека намерно предизвикувале пожари за подготовка на земјиште за плантажи. Претседателот Прабово Субјанто наредил и одземање дозволи на компании за кои постои сомневање дека се одговорни за незаконско расчистување на земјиштето.
Особено сериозен проблем се исушените тресетишта, кои поради системите за одводнување изградени за плантажите ја губат природната влажност. Кога ќе се запалат, пожарите можат да тлеат длабоко под земјата и да создаваат густ и опасен чад, поради што нивното гаснење е исклучително тешко.
Жителите стравуваат дека најтешкото допрва доаѓа. „Огнот опасно се приближува до куќите, луѓето се во паника“, сведочат локалните жители.
