(Видео) Протест пред Собранието во Приштина: Блокиран влезот, демонстрантите бараат измени на Законот за Специјализираните совети

Протест се одржува пред Собранието во Приштина, каде што е блокиран влезот во објектот во пресрет на седницата на која треба да се разгледува предлогот за измени и дополнувања на Законот за Специјализираните совети и Канцеларијата на специјализираниот обвинител во Хаг.

Главното барање на демонстрантите е усвојување на законските измени со кои, според предлагачите, би се намалиле надлежностите на Специјализираните совети.

На протестот повикале организации на поранешни припадници на УЧК, а пред Собранието од претходната вечер се присутни и учесници на протестите „Не во мое име“, кои се одржуваат секојдневно по изрекувањето на пресудите за поранешните лидери на УЧК.

— реклама —

Организаторите порачаа дека пратениците нема да можат да ја напуштат зградата додека не бидат усвоени измените на законот. Според медиумските информации, пред влезот било поставено комбе како дел од блокадата.

Околу зградата на Собранието биле распоредени и припадници на косовската полиција со опрема за сузбивање демонстрации.

Седницата била закажана за 9 часот, но не започнала во предвидениот термин. Таа е свикана на барање на пратеничката група на Движењето Самоопределување, додека предлогот за измени на законот го поднесе Демократската партија на Косово (ДПК).

— реклама —

Предлогот следува по пресудите од 16 септември, кога Специјализираните совети осудија четворица поранешни лидери на УЧК за воени злосторства. Хашим Тачи е осуден на 25 години затвор, Кадри Весели на 25, Јакуп Красниќи на 18, а Реџеп Селими на 13 години затвор.

— реклама —

Законодавниот одбор претходно едногласно го усвоил предлогот, а пратеникот на ДПК, Перпарим Груда, изјавил дека целта е да се ограничат дел од надлежностите на Специјализираниот суд.

Предлогот предвидува и скратување на максималната затворска казна, промена на местото каде што би се издржувале казните, како и можност за помилување.

Според предложените измени, Специјализираните совети би постапувале само по случаи поврзани со конкретните наводи од извештајот на Дик Марти за незаконско вадење и трговија со човечки органи. Другите случаи на воени злосторства, злосторства против човештвото или политичко насилство би биле префрлени во надлежност на судовите и обвинителствата на Косово.

— реклама —

ДПК усвојувањето на предлогот го поставила и како услов во разговорите за избор на претседател на привремените институции. Рокот за избор истекува утре, по што, доколку не биде избран претседател, Собранието би било распуштено и би следувале избори.

По изрекувањето на пресудите на 16 септември, во Приштина започнаа секојдневни протести и јавни активности во поддршка на осудените поранешни лидери на УЧК.