Рускиот претседател Владимир Путин изјави дека Русија ќе ги оствари своите цели во војната во Украина и дека државата ќе направи „сè за победа“, нагласувајќи дека земјата се наоѓа во еден од најважните периоди во својата понова историја.
Обраќајќи им се на пратениците во Државната дума, Путин рече дека учесниците во, како што Москва ја нарекува, „специјалната воена операција“ херојски се борат за својата татковина и уживаат поддршка од целиот руски народ.
„Ќе ги оствариме нашите цели и заедно ќе направиме сè за победа, за Русија“, изјави Путин.
Тој оцени дека рускиот народ одговорил на надворешните притисоци со единство и дека тоа, според него, отсекогаш било карактеристика на земјата во тешки времиња.
Путин додаде дека светот се наоѓа во фаза на создавање нов меѓународен поредок и дека Русија е дел од тој процес.
Осврнувајќи се на санкциите, рускиот претседател рече дека западните земји не успеале да ја ослабат Русија, тврдејќи дека тие мерки им нанеле штета пред сè на нивните иницијатори.
Тој ги обвини противниците на Русија дека, како што рече, не успеале да ја победат земјата на бојното поле и затоа користат „отворено терористички методи“.
„Никој никогаш не може да го скрши рускиот народ. Тоа никогаш не се случило и никогаш нема да се случи“, порача Путин.
Рускиот претседател истакна и дека властите продолжуваат да работат на подобрување на животниот стандард, намалување на сиромаштијата и создавање нови можности за граѓаните, додавајќи дека во тие области, според него, е постигнат значителен напредок.
