Руските сили во текот на ноќта извршија серија напади врз повеќе региони во Украина, при што загина едно лице, а најмалку 12 се повредени, соопштија украинските власти.
Најтешко беше погоден градот Запорожје, каде што руска бомба уништи семејна куќа. Во нападот загина 67-годишен маж, додека 22-годишно лице беше извлечено од урнатините по повеќечасовна спасувачка акција и е пренесено во болница.
Во одвоен напад со дрон врз станбена зграда во Запорожје беа повредени 53-годишна жена и 52-годишен маж. Спасувачките служби и полицијата сè уште работат на терен.
Руската армија нападна и во Сумската област, каде што биле фрлени најмалку седум авионски бомби. Повредени се пет цивили, а оштетени се куќи, возила и цивилна инфраструктура.
Во градот Днипро, напад со дрон предизвикал пожар во приватен дом, при што ударниот бран оштетил околни објекти, автомобили и продавница.
Украинското воено воздухопловство соопшти дека противвоздушната одбрана во текот на ноќта соборила 15 руски дронови над Днипропетровската област.
Новите напади следуваат откако украинскиот претседател Володимир Зеленски предупреди дека земјата се соочува со критичен недостиг од ракети за противвоздушна одбрана, кои, како што наведе, се неопходни за одбрана од сè почестите руски балистички напади.
