(Видео) Русија погоди уште еден клучен мост во Киев, Кличко: „Ситуацијата е многу драматична“

Русија утрово го погоди Северниот мост во Киев, уште една од клучните сообраќајни врски меѓу двата брега на реката Днепар, по серијата напади врз Јужниот мост во претходните два дена.

Градоначалникот на Киев, Виталиј Кличко, потврди дека во нападот се оштетени коловозот и контактната мрежа за тролејбусите.

— реклама —

„Погоден е Северниот мост. Итните служби се упатуваат на местото“, објави Кличко непосредно по нападот.

— реклама —

Сообраќајот преку мостот од левиот кон десниот брег бил запрен. Засега нема информации за загинати или повредени во денешниот напад врз мостот. Нападот следува по повеќекратните руски удари врз Јужниот мост во Киев. На 1 октомври два руски дрона погодија во близина на конструкцијата на мостот додека преку него се движел и воз на метрото. Од експлозивниот бран преку вентилацијата навлегла прашина во вагоните, но патниците и машиновозачот не биле повредени.

Јужниот мост потоа беше целосно затворен за автомобилскиот и метро-сообраќајот по повеќекратните напади. Киевските власти воведоа ограничувања и на други премини преку Днепар.

Поради нападите, Советот за одбрана на Киев одржа состанок на кој биле разгледувани функционирањето на градот, сообраќајот преку мостовите и движењето на метрото во услови на постојани воздушни напади.

— реклама —

Кличко состојбата во украинската престолнина ја опиша како „многу драматична“, посочувајќи дека руските сили напаѓаат критична инфраструктура, логистика, станбени објекти и други важни точки во градот.

Повеќе од една третина од околу три милиони жители на Киев живеат на источниот брег на Днепар, додека голем дел од работните места, државните институции и бизнисите се на западната страна, поради што ограничувањата на мостовите предизвикуваат сериозни проблеми во функционирањето на градот.

— реклама —

Рускиот претседател Владимир Путин претходно ги поврза засилените руски удари со украинските напади врз руските енергетски објекти. На форумот „Валдај“ тој призна дека украинските напади врз руските рафинерии делумно ја постигнале целта и рекол дека Москва возвраќа.