(Видео) Се чисти Камениот мост, се враќа и подната фонтана на плоштадот „Македонија“

Камениот мост и плоштадот „Македонија“ се опфатени со темелно чистење со кое треба да се врати уредниот изглед на едни од најпрепознатливите места во Скопје.

Во рамките на активностите се отстрануваат натписите, графитите и насобраната нечистотија. За чистењето се користи специјално средство и опрема за чистење под притисок.

— реклама —

Градоначалникот на Град Скопје, Орце Ѓорѓиевски, истакна дека Камениот мост и плоштадот „Македонија“ се важни симболи на градот, каде што се среќаваат генерации, се пречекуваат гости и се создаваат спомени.

— реклама —

„Токму оттука многубројни туристи ја понесуваат својата прва слика за Скопје како град со душа, историја и препознатливо место на светската туристичка мапа. Затоа, овие симболи заслужуваат постојана грижа и внимание. Скопје заслужува да биде чисто, уредено и гордо на своите обележја. А сите ние имаме обврска да го чуваме она што ни припаѓа заеднички“, истакна Ѓорѓиевски.

Паралелно со чистењето, привршуваат и активностите за архитектонско осветлување на Камениот мост. Во тек се и работите за повторно пуштање во употреба на подната фонтана на плоштадот „Македонија“, која со години не била во функција.

— реклама —

Со повторното активирање на фонтаната и осветлувањето на мостот, просторот во центарот на Скопје треба повторно да добие дополнителен визуелен изглед.