Бројот на загинати од тајфунот Јаги во Виетнам е 233, објавија утринава локалните медиуми.
Екипите за итни случаи извлекоа 48 тела од областа Ланг Ну, мало село во северната провинција Лао Каи, кое исчезна во поплавите во вторникот.
Уште 39 лица се водат како исчезнати, пренесува АП.
Низ Виетнам, 103 лица се уште се водат како исчезнати, а повеќе од 800 се повредени.
Јаги беше најсилниот тајфун што го погоди Виетнам во последните децении.
Тајфунот падна на копно минатата сабота со ветрови до 149 километри на час. Иако до неделата ослабе, врнежите продолжија, а нивото на реките се уште е опасно високо.
