Македонскиот рапер Марко Маринковиќ - Слаткар во „Претрес со Ландов“ отворено зборуваше за периодот по објавувањето на неговиот филм, откривајќи дека многу потешко ги доживувал навредите поврзани со неговото пелтечење отколку другите шпекулации што кружеле за него.
„Кога излегов, сите зборуваа дека сум наркоман. Никој не зборуваше дека д'ткам. Искрено, бев среќен. Нека зборуваат дека сум наркоман, само да не зборуваат дека д'ткам“, рече Слаткар, додавајќи дека таквите коментари можат силно да влијаат врз младите кои се соочуваат со сличен проблем.
Тој истакна дека токму поради тоа верува дека неговиот филм „Слушни ме“ може да помогне на многу луѓе, не само во Македонија, туку и пошироко.
Осврнувајќи се на државното финансирање на филмот, Слаткар рече дека, иако неговиот проект добил најмал износ меѓу поддржаните, во јавноста се создал впечаток дека ги добил речиси сите средства.
„Прво се објави дека сум ги зел сите пари од Агенцијата. Не можеш да се бориш против таква лавина. Никој не сакаше да слушне дека средствата што ги добив беа само мал дел од вкупниот буџет“, изјави тој.
Според него, најмногу го погодило тоа што, како што вели, „чист филм како солза“ бил ставен под сомнеж поради негативните реакции поврзани со државната поддршка.
