Вистинска драма се одвивала во трговски центар во австралиската држава Викторија, откако осомничен за кражба на „Тојота Лендкрузер“ се обидел да ѝ избега на полицијата возејќи низ преполниот објект.
Инцидентот се случил на 18 јуни во трговскиот центар „Нортленд“, кога полицијата го опколила украдениот теренец пред влезот. Наместо да се предаде, возачот неколкупати удрил во полициско возило, а потоа со голема брзина влетал во трговскиот центар.
На драматичните снимки се гледа како возилото минува низ ходниците додека преплашените купувачи бегаат. При излегувањето од објектот, теренецот ги пробива стаклените врати и удира во заштитен столб, а мајка со дете во последен момент успева да се тргне од неговиот пат.
Според локалните служби за итна помош, едно лице било згрижено поради претрпен шок, додека уште две лица биле прегледани, но не им била потребна медицинска помош.
Од полицијата соопштија дека располагаат со јасни снимки од осомничениот и очекуваат негово брзо приведување.
„Тојота Лендкрузер“ е меѓу најпопуларните теренци во Австралија, но воедно е и едно од најчесто крадените возила во земјата.
