(Видео) „Старшип“ успешно фатен во воздух над Тексас, историски успех за „СпејсЕкс“

„СпејсЕкс“ испиша нова страница во развојот на вселенската технологија, откако леталото „Старшип“ за првпат успешно беше фатено во воздух при враќањето на Земјата. Огромните механички раце го дочекаа леталото над лансирната рампа во Тексас, од каде што полета 22 часа претходно.

Иако компанијата не успеа да го изведе планираното двојно фаќање, бидејќи ракетниот потисен степен „бустер“ експлодираше кратко по лансирањето, враќањето на „Старшип“ беше успешно. Остатоците од бустерот беа обезбедени со пловки во Мексиканскиот Залив.

— реклама —

Од „СпејсЕкс“ оценуваат дека овој успех ја потврдува можноста за целосна повеќекратна употреба на леталото, што е клучно за идните мисии кон Месечината и Марс. Позитивно реагираше и НАСА, која со милијарди долари го финансира развојот на „Старшип“ за потребите на програмата „Артемис“.

Леталото, високо 124 метри заедно со ракетата, полета во петокот од базата на компанијата во Тексас. По одвојувањето од бустерот, „Старшип“ влезе во орбитата и испушти 26 сателити „Старлинк“. Потоа ја обиколи Земјата 14 пати на висина од 265 километри, што претставува значителен напредок во однос на претходната мисија.

— реклама —

Ова беше 15-тиот целосен лет на „Старшип“ од 2023 година и втор што достигна орбита. Од компанијата соопштија дека системите на леталото функционирале правилно, вклучувајќи го и топлинскиот штит.

— реклама —

Причината за неуспешното враќање на бустерот сè уште се истражува. Од „СпејсЕкс“ објаснија дека моторите се изгаснале предвреме, по што навигацискиот систем утврдил дека ракетата не е во соодветна положба за слетување и автоматски ја пренасочил кон морето, активирајќи ја постапката за самоуништување.

Компанијата планира во наредните месеци да започне со лансирање на „Старшип“ и од вселенскиот центар „Кенеди“ на Флорида. Леталото има клучна улога во плановите на НАСА за враќање на астронаутите на Месечината и изградба на постојана лунарна база.

— реклама —

Во рамките на мисијата „Артемис III“, четворица астронаути ќе се обидат да ја спојат својата капсула со „Старшип“ и со леталото „Блу Мун“ на „Блу Ориџин“. НАСА, пак, планира мисијата „Артемис IV“ да ја реализира во 2028 година, со цел повторно човечко слетување на Месечината, повеќе од половина век по програмата „Аполо“.