Струмичкиот бизнисмен Ристо Крмзов, кој е опфатен во истрага за наводни злоупотреби и даночни измами, во моментов е хоспитализиран во приватната болница „Аџибадем Систина“, изјави директорот на затворот „Шутка“, Бобан Утковски, во поткастот „Претрес“ со Ландов.
„Во моментов е во болници има проблеми, кичмата е фатена значи. Не можеше да се движи. Па сега заврши во болница“, вели Утковски.
На прашањето дали станува збор за државна болница, Утковски појасни дека лицето е сместено во приватна здравствена установа.
Во истрагата против Крмзов и група поврзани лица, кои се товарат за наводно злосторничко здружување, како и против 15 правни субјекти, се наведува дека во периодот од 2019 до 2024 година е причинета штета на државата од околу 94,3 милиони евра. Од таа сума, околу 30 милиони евра се поврзуваат со наводно незаконски поврат на данок на додадена вредност, реализиран преку, како што се тврди, лажни фактури и договори.
Тој во интервјуто, покрај случајот со Ристо Крмзов, се осврна и на состојбата на други затвореници, меѓу кои ги спомена Раде Трајковски „Штекли“, Гани Туша, Стојанче Јовановски и Љупчо Палевски „Палчо“.
